Sali Berisha rikthehet në selinë blu pas gati 11 muajsh, e presin me brohërima

Mbështetës të Partisë Demokratike dhe ish-kryeministrit Sali Berisha ishin mbledhur poshtë banesës së këtij të fundit në rrugën “Mustafa Matohiti” në kryeqytet, sapo u mor vesh lajmi se gjykata e ka lenë të lirë.

Me pas Berisha i është drejtuar selisë blu ku mbajti një konferencë për mediat.

“Të dashur miq, u krye edhe kjo punë. Piramida më e madhe e mashtrimit në historinë e drejtësisë europiane mori sot goditjen më fatale. Përshëndes çdo shqiptar me mirënjohjen më të madhe”, tha Berisha. Dhe sulmoi Taulant Ballën dhe Edi Ramën.

Ja dhe njoftimi i gjykatës për lirimin e tij nga arresti:

Nisur nga interesi që ka në publik dhe në media dosja “Partizani”, në ngarkim të të pandehurve Sali Berisha, etj…, ju njoftojmë se:

Sot, më datë 27.11.2024 Gjykata e Posaçme e Shkallës së Parë për Korrupsionin dhe Krimin e Organizuar, bazuar në nenet 228, 229, 230, 237 dhe 260 të K.Pr.Penale ka vendosur pranimin e kërkesës së kërkuesit të pandehurit Sali Berisha dhe revokimin e masës së sigurimit personal me karakter shtrëngues “arrest në shtëpi”.

Tiranë, më datë 27.11.2024

Gjykata e Posaçme e Shkallës së Parë për Korrupsionin dhe Krimin e Organizuar