3 policë kosovarë janë rrëmbyer nga ana e forcave speciale serbe. Kryeministri Albin Kurti thotë se policët kanë qenë 300 metra në brendësi të territorit të Kosovës, ndërsa forcat serbe kanë kaluar kufirin. Kurti kërkon lirimin e menjëhershëm të 3 efektivëve të policisë së Kosovës, ndërsa thekson se kjo lëvizje e Serbisë është bërë si hakmarrje për arrestimin në Kosovë të Millun Millenkoviq, një nga organizatorët e dhunës ndaj KFOR-it në veri.
Postimi i plotë
Tre zyrtarë të policisë së Kosovës janë rrëmbyer sot në Leposaviq në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë.
Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës.
Policia e Kosovës është treguar tejet e vetëpërmbajtur këto javët e fundit. Hyrja e forcave të Serbisë në territorin e Kosovës është agresion dhe synim për eskalim dhe destabilizim. Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë.