SPAK merr të pandehur kryetarin e Mallakastrës, Bardhi: Ky model duhet zhbërë përmes Vetting-ut në politikë

Sekretari i Përgjithshëm i PD-së, Gazment Bardhi, thotë se marrja e kryebashkiakut të Mallakastrës Qerim Ismailajn nga SPAK-u si i pandehur është shenjë që ky model duhet zhbërë përmes Vetting-ut në politikë. Bardhi shprehet se Edi Rama futi në politikë modelin e politikanit gangster që rri në pushtet në aleancë me krimin.

Postimi i plotë

Marrja si i pandehur i uzurpuesit ilegjitim të Bashkisë së Mallakastrës është një akt i mirëpritur drejt pastrimit të politikës.

Me kallëzimin tonë në SPAK, pasi treguam me dokumenta se mandati i tij ishte i paligjshëm, PD bëri vetëm detyrën ndaj qytetarëve. Ne i qendrojmë bindjes sonë se mund të ecim përpara drejt zhvillimit pa politikanë të korruptuar e të lidhur me krimin.

Të zgjedhurit në parlament, në qeveri dhe në bashki duhet të jenë shërbëtorë vetëm të interesave të qytetarëve. Edi Rama futi në politikë modelin e politikanit gangster, që rri në pushtet në aleancë me krimin.

Ky model duhet zhbërë përmes Vetting-ut në politikë. Shqiptarët meritojnë të qeverisen nga politikanë me integritet.