“SPAK të hetojë pa vonesë dosjet 339/1 dhe 184”, Bardhi me strukturat në Durrës: Presion i tmerrshëm nga krimi

Sekretari i Përgjithshëm i PD, Gazmend Bardhi, ka zhvilluar sot një takim me strukturat e qarkut të Durrësit, ku në fokus të diskutimeve ka qenë krimi i organizuar dhe shit-blerja e votave, duke u ndalur kryesisht te dosjet 339/1 dhe 184.

Në fjalën e tij, Bardhi ka thënë se Durrësi, Kruja e Shikau kanë qenë këto 6 vjet nën presionin e tmerrshëm të krimit të organizuar me mbështetje shtetërore.

“Degët e Durrësit, Krujës dhe Shijakut, si askush tjetër, kanë qenë këto 6 vjet nën presionin e tmerrshëm të krimit të organizuar me mbështetje shtetërore.

Demokratët janë përballur me bandat më të rrezikshme që, në bashkëpunim me Edi Ramën, Vangjush Dakon, Artur Bushin, Ilir Ndraxhi, Rrahman Rrahja, Elton Arbana, i kërëconin me bukën e gojës, me heqjen nga puna, me prishjen e biznesit, me sigurinë e familjes.

Dosja 339 na tregoi egërsinë me të cilën pushteti dhe bandat blejnë votat për Edi Ramën. Është detyrë e SPAK-ut të hetojë pa vonesë dosjet e blerjes së votave, 339/1 dhe 184. Ndëshkimi i atyre që kanë vjedhur votat është 1 nga 9 kushtet e Bundestagut për nisjen e negoiatave.

I garantova demokratët dhe qytetarët e Durrësit, Krujës dhe Shijakut se sakrifica e tyre nuk ka për të shkuar dëm. Ne jemi bashkë për të punuar derisa të sigurojmë zgjedhje të lira e të ndershme, që votat e shqiptarëve të mos preken nga Edi Rama, Vangjush Dako, Artur Bushi dhe banditët e tyre”, shkruan Bardhi në “Facebook”.