Studentët: Do vijojmë protestat

Jo vetëm nëpër rrjete sociale, por 99 Memet më të famshme të protestës së studentëve, janë ekspozuar sot poshtë zyrës së kryeministrit. Kjo formë e re proteste sipas tyre përcjell një mesazh “rezistencën”. “Duam t’ju themi që ne nuk ndalemi deri në plotësimin e të gjitha kërkesave tona”,- thanë studentët dje gjatë tubimit.

Kryeministri Edi Rama bëri të ditura të mërkurën 11 vendimet e qeverisë për kërkesat e studentëve, të përmbledhura në Paktin për Universitetin. Po studentët shohin si zgjidhje shfuqizimin e Ligjit për Arsimin e Lartë. “Nuk mund t’i shkojmë sekretares me videon e kryeministrit, duhet të kemi diçka konkrete. Ne duam shfuqizimin e Ligjit për Arsimin e Lartë dhe tërhiqemi nga protesta. Nuk duam miratim të pjesshëm të kërkesave tona. Protesta do të vazhdojë edhe në Janar. Do ta bojkotojmë mësimin deri ne plotësimin e kërkesave”,- tha një prej studentëve. Studentët do të vijojnë me qëndrimin përpara kryeministrisë edhe përgjatë festave për t’u riorganizuar në Janar.