Përgjimet, deputetët e PS i kërkojnë llogari Ministrit

[youtube url=”https://www.youtube.com/watch?v=ldlh1GpRc0c&feature=em-uploademail” width=”560″ height=”315″]

Deputetët e Partisë Socialiste i kanë kërkuar llogari ministrit të Brendshëm gjatë mbledhjes së Grupit Parlamentar në lidhje me raportimet se ekziston një pajisje e përgjimit tek Policia e Shtetit. Saimir Tahiri ka deklaruar përpara tyre se ekziston një pajisje që përdoret për trajnim, por jo pë përgjim. Të njëjtën gjë deklaroi Tahiri edhe përpara mediave para disa orësh.

Mbledhja është drejtuar nga kryeministri Edi Rama. Tahiri bëri të ditur se nuk ka pasur asnjëherë përgjime të kryera nga Policia e Shtetit.

Ndërkohë Ministri ka komentuar për mediat çështjen e pajisjes së përgjimit pas vizitës në Akademinë e Sigurisë, ku bashkë me disa anëtarë të Komisionit parlamentar të Sigurisë dhe drejtuesit kryesorë të Policisë së Shtetit, takuan studentët e kësaj Akademie:

Ministri Tahiri: Unë pata kënaqësinë të vijë këtu bashkë me deputetët e Komisionit të Sigurisë dhe sigurisht me drejtuesit e Policisë së Shtetit dhe Akademisë së Sigurisë  për të parë nga afër forcimin e kapaciteteve të Policisë së Shtetit dhe trajnimin e punonjësve të Policisë, e në mënyrë të veçantë studentët që nesër do hetojnë krimin e organizuar dhe paligjshmërinë në tërësi.

Ju e dini shumë mirë që Akademia e Policisë prej 10 viteve nuk funksiononte në krijimin e oficerëve të rinj, duke lënë një hapësirë boshe e mbi të gjitha duke paracaktuar  pamundësinë e Policisë së Shtetit (për shkak të burimeve njerëzore) që të hetonte siç duhet paligjshmërinë, informalitetin, kriminalitetin e duke mos iu shërbyer ashtu siç duhet qytetarëve.

Që kur nisëm punën menduam (dhe vazhdojmë të besojmë) se mënyra më e mirë  për të luftuar pandëshkueshmërinë është trajnimi i punonjësve të Policisë. Është mbi të gjitha pasurimi i burimeve të saj njerëzore me të rinj e të reja që kanë një eksperiencë universitare dhe i bashkohen Policisë për të luftuar krimin. Dhe ndërkohë rikthimi i Akademisë së Sigurisë në nivelin universitar ndihmon Policinë e Shtetit që të ketë burime më të trajnuara, më të afta për të luftuar kriminalitetin, e më të afta për t’u shërbyer qytetarëve. Ky është misioni ynë më i madh.

Ne na ka rënë barra të bëjmë atë që të tjerët nuk e kanë bërë. Pra, nëse ata që ishin përpara nesh, qeveria e shkuar, luftoi që ta shkatërronte Akademinë e Policisë duke i prerë krahët dhe mendjen Policisë së Shtetit, ne po mundohemi që Akademia e Sigurisë  të rikthejë “mendjen” në Policinë e Shtetit: njerëzit që luftojnë kriminalitetin dhe paligjshmërinë, duke qenë të trajnuar në mënyrë të plotë, e të përgatitur me stafin pedagogjik dhe me burimet njerëzore më të afta të mundshëm.

Dua të falënderoj drejtuesit e Akademisë,  stafin pedagogjik, të gjithë partnerët ndërkombëtarë (për ndihmën që i kanë dhënë Akademisë së Sigurisë për formimin e punonjësve të Policisë). Dua të falënderoj pa asnjë diskutim deputetët e Komisionit të Sigurisë  të cilët i kanë dhënë mbështetje qasjes sonë (për të luftuar paligjshmërinë dhe kriminalitetin nëpërmjet dijes, mendjes, diturive përpara se ajo të luftohet me muskuj e me armë).

Pyetje: Zoti ministër, ku ndodhet pajisja e përgjimit dhe si është futur ajo në Shqipëri? 

Ministri Tahiri:  Ju e dini që ka një pajisje përgjimi?

Gazetarja: Përderisa Prokuroria ka nisur një hetim...

Ministri Tahiri:  Më duhet t’ju sqaroj, për hir të respektit që kam për opinionin publik, se Policia e Shtetit nuk disponon, as ka disponuar e as i lejohet të disponojë në të ardhmen asnjë pajisje përgjimi. Në Policinë e Shtetit nuk ka asnjë pajisje përgjimi. Dhe Policia e Shtetit, bashkë me partnerët, nuk ka punuar kurrë e as nuk do punojë (të paktën sa jam unë në detyrë) me një pajisje përgjimi. Kjo nuk i lejohet me ligj. Dhe unë jam në detyrë, bashkë me drejtuesit e Policisë, për të garantuar që Policia e Shtetit bën detyrën pa shkelur ligjin.

Ndërkohë, në Policinë e Shtetit ka një trajnim që vazhdon prej disa javësh, i cili zhvillohet në bazë të një marrëveshjeje të nënshkruar midis qeverive në vitin 2007 ku parashikohej që ndërmjet Policisë Shqiptare dhe atyre të vendeve partnere (në rastin konkret me Policinë italiane) të bëhej shkëmbimi i eksperiencave me metodologjinë më të mirë, në rastet e hetimit të krimit e në veçanti të terrorizmit.

Në këtë kuadër, Policia e Shtetit ka zhvilluar, (sot që flasim) zhvillon, dhe do vijojë të zhvillojë në të ardhmen trajnime me policitë partnere – siç ka bërë Policia e Shtetit me po të njëjtën pajisje në të kaluarën, edhe kur unë nuk kam qenë Ministër e këta që flasin kanë qenë në qeveri.

Dhe ju riktheksoj, nuk bëhet fjalë për pajisje përgjimi!Bëhet fjalë për një pajisje fare normale në punën e Policisë që nuk ka asnjë lidhje me përgjimin! Këtë e deklaroj me përgjegjësinë time të plotë. Unë mbaj përgjegjësi për ato që them para publikut. Unë nuk jam në detyrë për të bërë atë që kanë bërë ata që kanë qenë më parë. Unë jam në këtë detyrë për t’u shërbyer qytetarëve maksimalisht dhe për të bërë gjithçka është e mundur që Policia e Shtetit të jetë sa më e përgatitur në luftën kundër krimit.

E ritheksoj, Policia e Shtetit nuk ka pasur, nuk ka, dhe nuk mund të ketë asnjë pajisje përgjimi. Të gjithë ata që mendojnë se ka vend për të parë konkretisht se çfarë bëhet, janë të ftuar të gjithë ata që mendojnë se ka vend për të parë konkretisht se çfarë bëhet. Janë të ftuar të vijnë, të asistojnë në të gjitha rrugët ligjore, të shikojnë, të verifikojnë, të hetojnë në çdo lloj mënyre 24/24, të shohin nëse Policia e Shtetit thotë të vërtetën dhe unë them të vërtetën në këtë deklaratë që po bëj, apo ne gënjejmë. Është fare e thjesht. Janë të gjithë të ftuar, ne jemi tërësisht në dispozicion, jemi tërësisht të hapur. Mjafton që gjithçka ndodh të bëhet në mënyrë ligjore duke lënë thashethemet dhe keqkuptimet për publikun.

Unë e deklaroj me përgjegjësi të plotë, Policia e Shtetit nuk pasur, nuk ka dhe nuk mund të ketë asnjë pajisje përgjimi. Bashkë me partnerët ne jemi (ku ndodhet kjo pajisje ku bëhet trajinimi zoti Tahiri. Pse nuk ishte në dispozicion të Prokurorisë). Për detaje duhet të pyesni instancat përkatëse. Unë di t’ju deklaroj që Policia e Shtetit dhe këtë ua deklaroj me shumë përgjegjësi nuk ka pasur, nuk ka dhe nuk mund të ketë asnjë pajisje përgjimi.

Prokuroria e Shtetit ka të gjitha mundësitë të verifikojë në cilën do mënyrë të mundshme dhe ligjore. Jemi tërësisht të hapur, tërësisht në dispozicion dhe pas asnjë merak. Ne nuk kemi asnjë merak. Ne jemi të fokusuar të bëjmë gjithçka është e mundur për të luftuar kriminalitetin.

Gazetari: A do të merrni pjesë nesër në Komisionin e Sigurisë?

Ministri Tahiri: Dëgjova diçka në media por nuk kam marrë ftesë zyrtare. Nëse më vjen ftesë zyrtare, jam 24 orë në dispozicion të gjithkujt që ka vesh të dëgjojë.

Gazetari: Zoti Tahiri. A është kjo një pajisje gjurmimi të numrave IMEI të aparatëve telefonit dhe prej cilit vit ndodhet në Akademinë e Policisë?

Ministri Tahiri: Ju bëni durim për të marrë detaje kur instancat përkatëse të bëjnë sqarimet e nevojshme. Unë jam këtu të deklaroj me përgjegjësinë maksimale të detyrës që mbaj dhe të përgjegjësisë që kam përball qytetarëve, që Policia e Shtetit, nuk ka pasur, nuk ka dhe nuk mund të ketë asnjë pajisje përgjimi, të ligjshme apo të paligjshme.

Policia e Shtetit nuk ka dhe nuk ka pasur dhe nuk mund të ketë asnjë pajisje përgjimi. Ata që sot çirren me lloj – lloj thashethemesh, se me demek Policia e Shtetit ka pajisje përgjimi, do marrin një përgjigje shumë shpejt. Nëse ju keni kuriozitete lidhur me këtë çështje, bëni durim. Do merrni përgjigje në rrugën ligjore. Unë di t’ju them për përgjegjësinë që mbaj përpara publikut, që jemi shumë të qetë. Po bëjmë detyrën në mënyrën më të mirë të mundshme, me të gjitha kapacitetet që ka Policia dhe duke mbajtur mbi shpatulla edhe atë që nuk ka bërë kurrë kërkush para nesh.

Jemi shumë të vendosur ta çojmë përpara luftën kundër informalitetit, kundër paligjshmërisë, kriminalitetit dhe mbi të gjitha jemi shumë të vendosur që të çojmë përpara drejtësisë të gjitha ata që deri dje kanë qenë të pandëshkueshëm, qoftë me imunitetit politik, qoftë me imunitetit financiar me çdo lloj imuniteti tjetër, ne nuk pyesim për këtë. Jemi shumë të vendosur, me Policinë e Shtetit, me të gjithë agjencitë ligjzbatuese të bëjmë maksimumin për të çuar përpara drejtësisë të pandëshkueshmit. Dhe jua ritheksoj. Qeveria e djeshme ka shume merak të merret me Policinë e Shtetit dhe me mua personalisht.

I mirëkuptoj dhe i falënderoj që më kujtojnë detyrën që po bëj çdo ditë, madje edhe dy herë në ditë. I falënderoj për të gjitha konferencat e shtypit që kanë bërë deri më sot, madje i ftojë që  të nxiten më shumë sepse çdo konferencë e tyre për shtyp mua më nxit të bëj akoma më mirë detyrën përball qytetarëve.

Unë jam shumë i bindur që sot, Policia e Shtetit është në linjën e parë të luftës kundër paligjshmërisë, kriminalitetit dhe mbi të gjitha të pandëshkueshmëve. Dhe pse Policia e Shtetit sot është në vijën e parë, sot është edhe në linjën e parë të akuzave. Këta duan të intimidojnë Policinë e Shtetit dhe nuk do ja arrijnë. Unë i jap mbështetjen time çdo punonjësi Policie, çdo drejtuesi policie që në mënyrë të ligjshme në mënyrë të rregullt i shërben qytetarëve duke luftuar kriminalitetin.

Ne do të jemi aty, dhëmb për dhëmb me krimin dhe nuk ka asnjë lloj intimidimi nga kushdo që mund të na tërheqi qoftë edhe gjysëm hapi mbrapsht.

Gazetari: Me Balilin, çfarë u bë zoti Tahiri?

Ministri Tahiri: I bashkohem kolegut tim Manjani, duhet të pyesni Prokurorinë.