Takimet e Bashës me krerët e degëve, porosia: Fokusi te Reforma Territoriale
Përgjatë ditëve të fundit, kryetari i PD-së Lulzim Basha ka zhvilluar takime me drejtuesit e degëve. Në mes të diskutimeve, Basha është konsultuar për Reformën Territoriale, e cila është një nga prioritet e demokratëve në këtë sesion Parlamentar.
Sipas PD-së, ndryshimet e vitit 2014, të bëra për llogari elektorale, rezultuan një dështim, kostot e të cilit i paguajnë qytetarët. Me porosi të Bashës, krerët e degëve do të mbledhin propozimet e anëtarësisë, grupeve të interesit dhe të qytetarëve, për të adresuar në mënyrë sa më gjithëpërfshirëse ndryshimet e nevojshme për një pushtet lokal pranë qytetarëve dhe në shërbim të tyre.
Reforma e miratuar 6 vite më parë shkriu 309 komuna dhe 4 bashki, duke e riformuluar hartën e njësive vendore në 61 bashki. Territoret e ish-komunave i kaluan në varësi bashkive.
Qeveria e mbështeti me zotimin se ajo ulte kostot administrative dhe u shërbente më mirë qytetarëve. Opozita bojkotoi diskutimet dhe miratimin në parlament duke akuzuar se ajo nuk bëhej në funksion të qytetarëve por për ndarje territoriale politike që favorizonte mazhorancën.
