Tërmeti në Turqi dhe Greqi. Presidenti Meta: Shqipëria do t’u gjendet pranë vendeve mike

Politikë E Premte, 30 Tetor 2020 14:45

Presidenti Ilir Meta ka deklaruar se Shqipëria do t’u gjendet paranë dy vendeve mike, Turqisë dhe Greqisë, të cilat u goditën sot nga një tërmet i fuqishëm. Në një mesazh në Facebook, Presidenti Meta deklaron se ky është një moment solidariteti njerëzor dhe reflektimi për të qëndruar pranë viktimave.

“Unë dhe gjithë populli shqiptar u qëndron pranë popujve miq Turk dhe Grek, me urimin për të përballuar këtë situatë të vështirë dhe lehtësuar dhimbjen familjeve që kanë humbur të dashurit e tyre. Shqipëria do t’u gjendet pranë vendeve mike me të gjithë kapacitetet e mundshme të saj”,- shkruan kreu i shtetit Ilir Meta.

Mesazhi i plotë i Presidentit Ilir Meta:

Thellësisht i tronditur nga tërmeti që goditi këtë mesditë ishullin grek të Samosit dhe preku rëndë edhe qytetin e Izmirit.

Lëkundjet e tërmetit u ndjenë në 4 shtete, më së shumti në Turqi e Greqi, por edhe në Bullgari deri edhe në Shqipëri.

Ky është një moment solidariteti njerëzor dhe reflektimi për t’u qëndruar pranë familjeve të viktimave dhe autoriteteve të Turqisë dhe Greqisë për të përballuar dëmet e shkaktuara nga kjo fatkeqësi natyrore.

Unë dhe gjithë populli shqiptar u qëndron pranë popujve miq Turk dhe Grek, me urimin për të përballuar këtë situatë të vështirë dhe lehtësuar dhimbjen familjeve që kanë humbur të dashurit e tyre. Shqipëria do t’u gjendet pranë vendeve mike me të gjithë kapacitetet e mundshme të saj. 🇦🇱🇹🇷🇬🇷.

Lexoni edhe…