Turqia përshëndet dëbimin e “gylenistit” nga Shqipëria si një sukses i shërbimit sekret turk

Artikulli i publikuar ditën e sotme nga “BalkanInsight” , për mësuesin turk Harun Çelik që u dëbua në 1 janar nga Shqipëria.

Celik mund të përballet me akuza si anëtar i një organizate terroriste dhe për spiunazh kundër shtetit turk – akuza të zakonshme për “Gulenistët”. Dhe që përfundon si rregull me vdekje ose burgim të përjetshëm, thonë edhe mediat e huaja për rastin në fjalë.

Shqipëria insiston që gjithçka ishte bërë në përputhje me procedurat normale për dëbimin e një shtetasi të huaj, i cili kishte tentuar të hynte në vend duke përdorur dokumente false.

“Ky person ishte në burg pasi policia kufitare e arrestoi atë në Rinas (aeroport ndërkombëtar) duke përdorur letra false. Bazuar në ligjin, “Për të huajt”, ai do të dëbohet “-tha zëdhënësi i policisë Gentjan Mullai për BIRN.

Mullai nuk pranoi të komentonte rolin e supozuar të MIT dhe tha: “Deklarata zyrtare do të publikohet më vonë”.

Sidoqoftë, mediat turke kanë përshëndetur këtë ekstradim si “një operacion të suksesshëm” të kryer nga MIT, një pretendim që ka turpëruar autoritetet shqiptare, të cilat vazhdojnë të kundërshtojnë pretendimet e përfshirjes së palës turke.

Tirana gjithashtu ka mohuar që kthimi i detyruar i Celik në Turqi ishte produkt i marrëdhënies së ngushtë midis kryeministrit shqiptar Edi Rama dhe Presidentit të Turqisë, Rexhep Tajip Erdogan.

“Kjo ishte një çështje procedurash ligjore, jo të lidhura me zyrën e Kryeministrit,” i tha BIRN-it Endri Fuga, zëdhënësi i Ramës.

Avokati i Celik në Shqipëri, Alban Bengasi, tha se i akuzuari “Gulenist” kishte paraqitur një kërkesë për azil politik, kështu që dëbimi i tij nga Shqipëria ishte i paligjshëm.

Partitë opozitare kanë shprehur shqetësim nëse është ndjekur apo jo procesi i rregullt i dëbimit.

“Prioritet” është për çdo vend demokratik, posaçërisht për hir të proceseve integruese të Bashkimit Evropian, të respektojë këto parime, të drejta dhe detyrime,” deklaroi Partia Demokratike në Twitter, duke iu referuar shpresave të anëtarësimit të Shqipërisë në BE.

Qeveria turke akuzon Gulen, i cili jeton në SHBA, se qëndroi pas një përpjekje të dështuar për grusht shteti në vitin 2016. Pas përpjekjes për grusht shteti, ajo filloi t’i referohej lëvizjes së Gulen si “Organizata terroriste Fethullahist”, ose FETO.

Që atëherë, qeveria ka arrestuar mijëra njerëz, ka pushuar dhjetra mijëra nga punët e shërbimit publik dhe ka mbyllur qindra kompani, OJQ dhe institucione arsimore për shkak të lidhjeve të pretenduara me Gulen.

Ankaraja gjithashtu ka bërë presion ndaj shteteve të Ballkanit që të dorëzojnë gulenistët e supozuar dhe të mbyllin çdo institucion që lidhet me lëvizjen e tij.

Shumica i kanë rezistuar thirrjes së qeverisë turke për ekstradime, por agjensia e inteligjencës MIT është përfshirë në dy operacione të rëndësishme për të dëbuar të dyshuarit Gulenist, nga Kosova dhe Moldavia, të cilat ndezën debat politik në të dy vendet.