Vasili: Incerenatori i Elbasanit, vjedhje e provuar me dokumente. Financimi me 25 milionë euro

Nënkryetari i LSI-së, Petrit Vasili në një konferencë për mediat, tha se Incerenatori i Elbasanit është një vjedhje e provuar me dokumente, dhe sipas tij financimi është me 25 milionë euro. ”Po të shikoni janë dy pronarë, për të kuptuar se sa e trashë është vjedhja. Stela Gugalli është pronarja fiktive te ‘Albtech Energy’, e cila në 2014-n bëhet pronare, por ama deri në 2015-n vazhdon të paguhet si ekonomiste pranë kompanisë së Klodian Zotos. Pra, kuptohet fare qartë që e ashtuquajtura pronare ishte një ekonomiste tek firma. Pra, është shumë e qartë dhe e trashë mënyra se si ndërtohet e gjithë skema”,-tha Vasili.

Pjesë e parë e denoncimit

LSI denoncoi disa ditë më parë aferën e inceneratorit të Tiranës, ku ligji u shkel dhe u dhunua në funksion të kësaj grabitjeje të madhe, ku kryetari i Bashkisë së Tiranës rrëmbeu të gjitha kompetencat e tij dhe të të gjitha institucioneve, të Këshillit Bashkiak, Qarkut e të gjitha të tjerat, duke vënë në mënyrë të paligjshme firmën në këtë aferë, duke i detyruar njëkohësisht qytetarët e Tiranës që të paguajnë edhe për plehra, që nuk i prodhojnë.
E njëjta histori si me Rrugën e Kombit ku paguajnë edhe makina që nuk kalojnë.

Një qeveri e cila edhe ministrat e saj e kundërshtojnë për shkak të efekteve financiare, megjithatë ajo ecën përpara se afera nuk pret dhe ku çdo efekt tjetër financiar nuk merret parasysh, ndonëse dhjetëra milionë euro iu ngarkuan buxhetit të shtetit, e ku katër bashki të tjera të Qarkut të Tiranës as nuk u begenisën fare, por vetëm një firmë të paligjshme të Erion Veliajt bënë që afera të ecte përpara. Kjo çështje është në SPAK. Mijëra faqe janë një denoncim dokumentar i palëvizshëm, presim që SPAK të lëvizë të zgjohet, pasi ne bëmë të pamundurën që t’ia lehtësonin punën atij sa më parë.

Vijmë sot në vijim për të denoncuar skandalin e madh financiar në një tjetër rreth ku është shtrirë afera e inceneratorëve, në rrethin e Elbasanit dhe do ta kuptojmë më mirë duke e parë dhe duke e ndjekur se si praktikisht paratë e shqiptarëve grabiten në mënyrë shumë të qartë, ditën për diell. Kjo vjedhje është e provuar me dokumente, të cilat flasin vetë, ndërkohë që ilustrohet me gjithë pamjet që kemi këtu dhe në qoftë se do ta shikoni me vëmendje gjatë gjithë skemës, del shumë e qartë disa momente kyçe: Së pari, që ka vjedhje, evazion, korrupsion dhe përfituesit financiarë të kësaj afere korruptive janë të qartë, pasi janë vetë qeveritarët. Është një skemë e mirë strukturuar, e ndërtuar me vetëm një qëllim: grabitjen e parave të shqiptarëve.

Por ndërkohë ne po ecim që ju të njiheni me faktet dhe të kuptoni më së miri që askusht nuk është ndalur vetëm e vetëm për ti grabitur këto para. Dhe pyetja e parë është që: Nga erdhën paratë? Sigurisht që kanë qenë dy ministri që kanë financuar, Ministria e Mjedisit dhe ajo e Energjisë, të cilët kanë dhënë jo pak, por 25 milion euro. Pra, 25 milion euro janë në dispozicion të kësaj afere të jashtëzakonshme. Po të shikoni janë dy pronarë, për të kuptuar se sa e trashë është vjedhja. Stela Gugalli është pronarja fiktive te ‘Albtech Energy’, e cila në 2014-n bëhet pronare, por ama deri në 2015-n vazhdon të paguhet si ekonomiste pranë kompanisë së Klodian Zotos. Pra, kuptohet fare qartë që e ashtuquajtura pronare ishte një ekonomiste tek firma. Pra, është shumë e qartë dhe e trashë mënyra se si ndërtohet e gjithë skema.

Ne do të ndjekim rrugën e këtij financimi që ju shikoni të ‘Albtech Energy’, e cila ka përfituar 13 milion e 621 mijë e 941 euro. Le të ndjekim këtë rrugë dhe ju do ta keni shumë të lehtë dhe shumë të qartë se si u grabitën paratë. Dhe po ta shikoni keni 2 milion euro naftë dhe blerje të tjera pa fund të tjera dhe po të keni vënë re pak më përpara, paguhen për konsulenca juridike, para të cilat i përfitojnë të njëjtët pronarë, të cilët hapin edhe firmë konsulence dhe marrin prapë para nga paratë e inceneratorëve. Pra, e bëjnë në mënyrë fiktive dhe po atje fusin duart. Bëjnë konsulenca të mëdha juridike dhe marrin dhjetëra mijëra euro. Pra, paguajnë vetveten, gjoja se po bëjnë konsulencë. Kanë vjedhur pa u trembur se kanë menduar që faktet nuk do të zbulohen asnjëherë dhe këto nuk do të dënohen asnjëherë.