Vasili: LSI, gjithmonë në ngjitje. Fitojmë 11 mandate në Tiranë

Nënkryetari i Lëvizjes Socialiste për Integrim, Petrit Vasili thotë se synimi për qarkun Tiranë, është që më 25 prill LSI-ja të fitojë 11 mandate. Në një intervistë për emisionin “7 pa 5”, ai deklaroi se një rezultat i tillë është i arritshëm jo vetëm në qarkun e Tiranës, por edhe në qarqe të tjera të vendit për shkak të programit që ka LSI-ja.

”Ne synojmë 11 mandate në Tiranë sepse kemi patur në zgjedhjet e shkuara 5 mandate. Fryma jonë, organizimi, kandidaturat, lista e kanidatëve është më e mira që ka patur ndonjëherë LSI. Këto bëjnë që LSI të konkurrojë me një ritëm si asnjëherë më parë në Tiranë.

LSI-ja ka qenë gjithmonë në ngjitje. Të njëjtat pritshmëri janë edhe për qarqet e tjera të rëndësishme të vendit, Durrësi, Fieri, Elbasani, Berati, Vlora.

Këto janë synimet, për një garë për të luftuar në këto qarqe për forcë e parë. Kemi përgatitur një program që është realist, me këmbë në tokë dhe i bën të prekshme gjërat, nuk është në ajër, nuk është program me 3D. Kemi ndërthurur tre breza”.