Veliaj prezanton Buxhetin 2015 të MMSR-së: “Kemi rritur pagesat për shtresat në nevojë”

Në fjalën e tij, z. Veliaj u përqendrua veçanërisht te buxheti për shtresat në nevojë dhe reformën e pensioneve, duke theksuar faktin se 2014 ishte viti i parë pas pesë vitesh ku personat me aftësi të kufizuara morën në kohë pagesat e tyre, e kjo do të vazhdojë pa ndërprerje edhe në vitet e tjera. Sipas ministrit Veliaj, për shtresën e PAK dhe ndihmës ekonomike në buxhetin e vitit 2015 janë përcaktuar 20 miliard lek.

“Jo vetëm paguajmë më shumë se ata që ikën, ne po paguajmë më shumë edhe se viti i kaluar që kishim vetë, çka na mundëson jo vetëm të jemi korrekt, por edhe të rrisim pagesat për të gjithë ata që janë më në nevojë se disa të tjerë”, u shpreh z. Veliaj. Ai shtoi se falë mbështetjes nga buxheti, vitin tjetër do të rishikohet i gjithë modeli i vlerësimit të aftësisë së kufizuar në vend në përputhje me modelin e ri bio-psiko-mjekësor të vlerësimit.

“Gjatë kohës që kemi pilotuar skemën e re dixhitale të ndihmës ekonomike, u njoha me Agronit, i cili jeton në Thumanë dhe ka një familje me 7 anëtarë, për të cilët duhet të kujdeset. Si i papunë, merrte ndihmë ekonomike rreth 30 mijë lekë. Por, falë punës së Shërbimit Social Shtetëror kemi larguar 20 mijë abuzues nga skema, çka nënkupton se për familje si ajo e Agronit që merrte 30 mijë lekë, sot merr 80 mijë lekë”, tha z. Veliaj.

Ai nënvizoi se në vijim të zbatimit të skemës pilot të ndihmës ekonomike në tre qarqet e vendit, vitin tjetër, pas korrigjimeve të ndërmarra në bazë të të dhënave të nxjerra nga sistemi pilot, do të fillojë edhe shtrirja e skemës në të gjithë vendin. Ndërkaq, pjesë e skemës së ndihmës ekonomike për vitin 2015 do të jetë dhe rimbursimi i çmimit të energjisë elektrike me një vlerë shtesë të parashikuar në buxhetin e MMSR prej 16 miliard lekësh.

Lidhur me reformën e pensioneve, ministri Veliaj tha se falë kësaj reforme dhe heqjes së pensionit tavan, do të mundësohet që nga 1 janari çdo shqiptar të përfitojë pensione më të larta. Formula e re, pension social plus 1% të pagës për çdo vit sigurimi shpërblen ata që deklarojnë të gjitha vitet me pagën reale. Gjithashtu, për herë të parë do të kemi aplikimin e skemës së pensionit social nga i cili pritet që në vitin e parë të përfitojnë rreth 5000 qytetarë.

Ai e cilësoi si një lajm të mirë faljen e kamatvonesave për efekt të pagimit të kontributeve të sigurimeve shoqërore për banorët e fshatit, duke u bërë thirrje 290 mijë të vetëpunësuarve në bujqësi që të shfrytëzojnë ditët e mbetura deri në 31 dhjetor për të shtuar vitet e sigurimit të tyre duke paguar kontributet me një çmim shumë të ulët.