Vetëm apo me Metën në zgjedhjet lokale? Berisha: Do të diskutojmë dhe jemi për koalicione

Kryetari i Partisë Demokratike Sali Berisha, gjatë bashkëbisedimit të përjavshëm me gazetarët, është shprehur ditën e sotme se në zgjedhjet lokale që do të zhvillohen pas disa muajsh, mund të ketë koalicion me Partinë e Lirisë, por do të zhvillohen primaret.

“Ne mirëpresim dekretin, caktimin e datës së zgjedhjeve. Nuk kishte asnjë arsye që të mos dilte që ditën e parë të inaugurimit të presidentit të ri. PD në këto zgjedhje sjell risinë më të madhe në historinë e këtij vendi, sjell primaret të cilat pas vendosjes së pluralizmit politik janë arritja më e madhe e demokracisë shqiptare. Ne presim me shumë përkushtim dhe kënaqësi zbatimin e këtij zotimi solemn në zgjedhjet që vijnë. Kjo do të jetë pas themelimit të pluralizmit politik, risia më e madhe që themelohet në demokracinë shqiptare. E mirëpresim datën. Do të diskutojmë dhe jemi për koalicione, por natyrisht parimi ynë bazë nuk ndryshon: ne jemi për primare. Një gjë është e sigurt që kandidatët nuk do ti caktojë Sali Berisha”, tha Berisha.