Vëzhguesit vendorë: Buxheti 2015 duhet të llogarisë se mot kemi zgjedhje

Ky është apeli i lëshuar nga Koalicioni i Vëzhguesve Vendorë, sipas të cilëve, lidhur me këtë detyrim kushtetues e ligjor, i kërkohet Ministrisë së Punëve të Brendshmë, Ministrisë së Financave dhe komisionit Parlamentar për Ekonominë dhe Financat, të bëjnë parashikimin dhe miratimin e fondit të nevojshëm për realizimin e këtij procesi që përcakton drejtëpërsëdrejti standardet e ardhshme zgjedhore.

“Për më tepër, sikundër është kërkuar edhe nëpërmjet deklaratës së 29 Korrikut për marrjen e masave për pastrimin e Listës së Zgjedhësve prej rekordeve të dyshura si të dubluara, si dhe për saktësimin e adresave të rreth 350.000 zgjedhësve, KVV iu kërkon këtyre institucioneve parashikimin dhe miratimin e shpenzimeve të nevojshme për zgjidhjen serioze, cilësore dhe në një kohë sa më të shpejtë të problemeve të mësipërme, të cilat në kushtet e zgjedhjeve për 61 njësitë e reja vendore, kanë një peshë të konsiderueshme në përcaktimin jo vetëm të standardeve të zgjedhjeve, por edhe të rezultateve që do të dalin prej tyre”, cilëson Koalicioni i Vëzhguesve Vendorë.

Në përfundim, Koalicioni ngre shqetësimin edhe për mosparashikimin në projektbuxhetin e vitit 2015 të një fondi të veçantë për zbatimin e Teknologjive të Reja të Votimit dhe Numërimit në zgjedhjet e ardhshme, sikundër parashikohet nga Kodi Zgjedhor, gjë që sipas tij bën akoma edhe më të domosdoshme gjetjen e menjëhershme të konsensusit dhe uljen e të gjithë faktorit politik për ndërmarrjen sa më parë të reformës zgjedhore dhe të të tjerave me rëndësi kushtetuese dhe jetike për vendin dhe qytetarët.