Votimet mbyllen në orën 19:00, Celibashi: Vijon pa problematika procesi i zgjedhjeve
Komisioneri Shtetëror i Zgjedhjeve, Ilirjan Celibashi thotë se në të 6-ta bashkitë po vijon pa probleme procesi i votimit. Celibashi tha se problematika janë evidentuar kryesisht me kamerat e vëzhgimit dhe përdorimin e pajisjeve të identifikimit elektronik. Ai bëri me dije se në 5 qendra votimi, identifikimi është bërë manualisht dhe në 15 të tjera është bërë zëvendësimi i pajisjeve.
“Kemi marrë raportime mbi problematikat në disa QV. Në total 13% e këtyre problematikave lidhen me kamerat e vëzhgimit. 73% me përdorimin e PEI, 15% me çështje të administrimit të zgjedhjeve. 40% nga bashkia Shkodër, 30% Durrës, 12% Lushnjë, 9% Dibër, 6% Rrogozhinë, nga Bashkia Vorë nuk ka raportime për problematika.
Për pajisjen e identifikimit elektronik, në 5 qendra votimi identifikimi është bërë manualisht. Në 15 qendra votimi është bërë zëvendësimi i pajisjes elektronike të identifikimit elektronik. Në lidhje me kohën e hapjes së QV, 70% janë hapur në orën 07:00, 25% janë hapur deri në orën 07:30.
Kemi bërë edhe verifikime në terren të situatës dhe nuk raportohen problematika domethënëse. Ka disa probleme me mënyrën e zhvillimit të procesit të votimit, që ka patur grumbullime të personave të paautorizuar, kemi komunikuar me KZAZ respektive dhe është raportuar që situata është kthyer në normalitet”.
