Yuri Kim, thirrje KED: Gjykata Kushtetuese duhet të ngrihet deri në fund të vitit. Veproni sa më shpejt

Ambasadorja e SHBA në vendin tonë Yuri Kim ka përshëndetur shpalljen e vakancave për Gjykatën Kushtetuese nga Presidenti Ilir Meta dhe Kuvendi. “Shqipëria duhet të ketë Gjykatën e saj Kushtetuese deri në fund të vitit”, është shprehur ambasadorja Kim në një mesazh në Twitter.

Ambasadorja Kim i ka bërë thirrje edhe KED që të veprojë shpejt me vlerësimin e kandidatëve pasi nuk ka kohë për të humbur.

“Presidenca dhe Parlamenti tani kanë publikuar listat e tyre përkatëse të kandidatëve për Gjykatën Kushtetues. Ne i duartrokasim ata që iu përgjigjën thirrjes për të shërbyer. Ne inkurajojmë Këshillin e Emërimeve në Drejtësi të veprojë shpejt për të vlerësuar kandidatët. Shqipëria duhet të ketë Gjykatën e saj Kushtetuese deri në fund të vitit”, shkruan Kim në Twitter.