Zgjedhje të reja në veriun e Kosovës, Osmani: Do ta shqyrtojmë, por duhet peticion nga serbët

Gjermania dhe Franca kërkojnë zgjedhje të reja për katër komunat në veri të Kosovës. Ishte kjo zgjidhja e ofruar në samitin e Komunitetit Politik Europian në Moldavi.

Presidentja e Kosovës, Vjosa Osmani u shpreh e gatshme që Kosova ta shqyrtonte si mundësi, mbajtjen e zgjedhjeve në katër komunat veriore. Ajo sqaroi se organizimin e një votimi të ri e lejon ligji, por duhet të ndodhë përmes një peticioni të iniciuar nga qytetarët serbë që jetojnë në komunat veriore.

Sa i përket situatës në Leposaviq, Mitrovicën e Veriut, Zubin Potok dhe Zveçan, Osmani tha se qetësia mund të vijë vetëm nëse Serbia ndal bandat kriminale atje. Presidenti serb akuzoi Kosovën duke pretenduar se është fajtore e vetme për krizën në veri. Ndërsa gjatë gjithë samitit, dy presidentët kanë shkëmbyer akuzat.