Nënkryetarja e Kuvendit serb: Të arrestohet Shaip Kamberi, gabuam me lirimin e Kurtit

Deputeti i vetëm shqiptar në Kuvendin e Serbisë, Shaip Kamberi, gjatë fjalës për raportin në lidhje me dialogun me Prishtinën, tha se Kosova është e pavarur nga Serbia dhe kjo gjë duhet të pranohet sa më shpejt. Deklarata ka sjellë reagime të ashpra në opinionin publik në Beograd.

Nënkryetarja Snezhana Paunoviç kërkon arrestimin e deputetit. “Nëse kemi gabuar me lirimin e Albin Kurtit nga burgu, mos të gabojmë me mosarrestimin e Shaip Kamberit”, tha Paunoviç.

Kuvendi i Serbisë miratoi mëngjesin e së enjtes raportin për dialogun me Kosovën. Për miratimin e dokumentit votuan 205 deputetë, ndërsa kundër ishin 57.