Pendarovski nuk i ndal goditjet ndaj Thaçit e Vuçiçit: E patolerushme të flisni për korrigjim kufijsh

Përveç krerëve të Bosnje e Hercegovinës dhe Malit të Zi, ashpër kundër idesë së Hashim Thaçit dhe Aleksander Vuçiqit për korrigjim të kufijve ka dalë edhe presidenti i posa zgjedhur i Maqedonisë Veriore, Stevo Pendarovski.

Pendarovski thotë se një ide e tillë nuk i takon mendësisë së shekullit 21, duke e cilësuar si të tmerrshme. Ai thotë se nuk mund të ndodh diçka më e keqe, sesa dikush t’i qaset seriozisht implementimit të një plani të tillë për lëvizje të kufijve apo shkëmbimit të territoreve.

“Në lidhje me idenë e korrigjimit të territoreve unë jam një nga politikanët e rrallë në rajon që flas mjaftë shpesh. Unë mendoj se bëhet fjalë për ide anarkike që nuk i takon shekullit 21. Mendoj se ajo është ide e shekullit 19 ose ndoshta edhe më herët”, ka thënë Pendarovski, shkruan Gazeta Express.

Presidenti maqedonas thotë se është e papranueshme që të flitet për një ide të tillë, duke kujtuar se çfarë kishte ndodhur herën e fundit, kur fuqitë e mëdha kishin lejuar që të shkëmbeheshin territore në vitin 1923.

“Është e patolerueshme që të flitet për një ide të tmerrshme për shkëmbim të territoreve në shekullin 21. Herën e fundit një gjë e tillë ka ndodhur me mbështetjen e fuqive të mëdha para rreth një shekulli, në vitin 1923. Pyetni grekët dhe turqit se si edhe ditëve të sotme kanë pasoja nga shkëmbimi i territoreve. Nuk mund as të mendoj se mund të ndodh diçka më e keqe, se sa dikush të mendojë seriozisht t’i qaset ekzekutimit të një projekti të tillë”, ka shtuar ai.

Ai thotë se është shumë e lehtë që të bëhet një pastrim i territoreve, por potencon se duhet ruajtur multietniciteti pasi aty qëndron bukuria dhe pasuria e gjithë shteteve fqinje.

“Në botën moderne ne duhet me dialog dhe kompromis të gjejmë zgjidhje për problemet që na tangojnë. Puna më e lehtë që mund të bëni është që ta pastroni territorin nga njerëzit ndryshe nga ju ose nga unë, dhe qeverisni ata territore. Por unë mendoj se bukuria dhe pasuria e shtetit tonë dhe e gjithë shteteve fqinje multietnike, është pikërisht tek shumëllojshmëria dhe mendoj se sa më parë duhet të ndalohet me recitimin e asaj teme, po e potencoj këtë për politikanët që janë në Qeveri në shtetet fqinje”, ka shtuar Pendarovski.

Ndërkohë sa i përket mundësive për eskalim të situatës, presidenti i Maqedonisë së Veriut, thotë që gjasat për të ndodhur diçka e tillë janë minimale.

“Trendet për cenim të sigurisë janë minimale. Situata po qetësohet dhe përllogaritet se për një periudhë të shkurtë, sepse atje nuk mund të bëhen parashikimi afatgjate, edhe po të këtë tensione me karakter të njëjtë dhe me proporcione të njëjta, ata nuk do të jenë aq të mëdha sa të cenojnë rrethinën e Republikës së Kosovës e aq më pak shtetin tonë”, ka thënë ndër të tjera kreu i Maqedonisë Veriore.

Kundër nismës së Tha֛çit dhe Vuçiqit për prekje të kufijve kanë dalë edhe shtetet më të fuqishme të Evropës, si Gjermania, Franca dhe Britania e Madhe.

Kancelarja gjermane, Angela Merkel, i ka dhënë kësaj ideje goditjen përfundimtare në Samitin e Berlinit, duke e bindur kështu edhe presidentin francez, Emannuel Macron.

Megjithatë Thaçi vazhdon të deklarojë se ai Samit ishte një dështim, dhe se në kryeqendrën gjermane, as nuk ishte shuar ndonjë ide, e as nuk kishte lindur ndonjë ide e re./GazetaExpress/