Përleshje në kufirin grek, gaz lotsjellës ndaj grave e fëmijëve

Tensionohet situata pranë kufirit grek me Maqedoninë Veriore, ku qindra emigrantë po përpiqen të kalojnë për të vazhduar rrugëtimin drejt Gjermanisë.

Policia hodhi gaz lotsjellës kundër nënave dhe fëmijëve, ndërsa emigrantët mësynë një stacion grek dhe u përleshën me trupat në kufi. Emigrantët ishin mbledhur në një fushë në përpjekjen për të kaluar ilegalisht përmes Ballkanit drejt Europës Perëndimore.

Përleshjet shpërthyen në kampin e Diavata-s, pas thashethemeve në mediat sociale se kufiri për migrantë do të hapet.

Në rrjetet sociale u fol për një lëvizje të organizuar për kalimin e kufirit veri-perëndimor me Shqipërinë në fillim të muajit prill.

Por mediat greke i përshkruan si “lajme të rreme” njoftimet në “Facebook”. Sipas njoftimeve, disa emigrantë jashtë kampit Diavata hodhën gurë në drejtim të policisë, e cila më pas u përgjigj me gaz lotsjellës. Qindra njerëz u tërhoqën zvarrë.

“Njerëzit duan që qeveria të hapë kufijtë në mënyrë që të shkojnë në një tjetër vend. Këtu ndihemi shumë keq dhe ka shumë problem”, tha një emigrant nga Iraku.

Në Athinë refugjatët u panë të shtrirë në shinat e trenit, ndërsa thërrisnin “Gjermani” dhe “Hapni kufijtë” në një protestë tjetër në stacionin kryesor hekurudhor të kryeqytetit grek.

Shërbimi i trenave u pezullua. Dhjetëra-mijëra emigrantë mbeten në kampet e mbipopulluara në Greqi. Mes tyre përfshihen afganë, sirianë dhe irakianë të mbërritur gjatë viteve 2015-2016.