“Pse duhet të më vrisnin fëmijën tim? Shqiptarët nuk i donin pakicat, tani unë nuk e dua jetën pa fëmijën tim, pa shpirtin tim”, kështu shprehet mes lotësh nëna e 35-vjeçarit Konstantinos Kocifas, pas lajmit për vrasjen e të birit nga RENEA në Bularat.
Fillimisht ngjarja asaj iu mbajt e fshehtë duke thënë se të birin ia kishin arrestuar, por më pas është njohur me të vërtetën.
Kanë qenë mediat greke ato që i kanë marrë një prononcim asaj, e cila ka qenë mes lotësh dhe nuk ka mundur të flasë shumë. “Unë nuk e dua më jetën time pa fëmijën tim, pa shpirtin tim”– ka thënë ajo, shkruan Protothema.
Me tej, gazeta shkruan se dy motrat e viktimës që jetojnë prej vitesh në Athinë, shkuan në fshat gjatë natës për ti qëndruar pranë nënës së tyre.
“Gruaja ditën e djeshme nuk ishte në dijeni për ngjarjen, por ajo pa policinë shqiptare të armatosur, e cila shkoi në shtëpinë e saj për të kontrolluar për djalin”, shkruajnë mediat greke.
https://www.youtube.com/watch?v=B5gb0IEjZeg
Kujtojmë se paraditen e djeshme shtetasi grek Kostandions Kaçifa, 35 vjeç, lindur dhe banues në Bularat Gjirokastër hapi zjarr mbi makinën e policisë, për shkak se pretendonte se ishte hequr flamuri që kishte vendosur në qendër të fshatit. Pas rezistencës së vazhdueshme nga ana e tij, RENEA e ekzekutoi 35-vjeçarin, i cili njihej për thirrjet e tij të urrejtjes ndaj shqiptarëve.
‘’Shtetasi Kaçifa ka vijuar të qëllojë kundër forcave speciale për gati 30 minuta, duke rrezikuar seriozisht jetën e tyre. Në kundërpërgjigje, të forcave speciale gjatë shkëmbimit të zjarrit ka mbetur i vrarë shtetasi Kostandinos Kaçifa.
Në vendngjarje u sekuestruan në cilësinë e provës materiale një armë automatike, model Kallashnikov, dy karikatorë municioni, një çantë me fishekë luftarakë, si dhe 31 gëzhoja. Në banesën e shtetasit Kaçifa u sekuestrua edhe një uniformë kamoflazh”, sqaronte dje policia shqiptare.