Varoufakis prezanton partinë e tij, iu referohet “shqiptarëve të armatosur”

Ish-ministri grek i financave, Janis Varoufakis, ka prezantuar të hënën në mesditë në Athinë partinë e re MeRA25, që është pjesë e lëvizjes evropiane DiEM25 (Democracy in Europe Movement 2025 – Lëvizja për Demokraci në Evropë 2025).

Varoufakis tha se Greqia po përballet me rrezikun më të keq pas luftës civile, pasi iu nënshtrua një falimentimi të katërfishtë: të shtetit, bankave, familjeve dhe biznesit.

Ai vërejti se programet e shpëtimit, në vend që të shpëtonin vendin e çuan në një regjim kolonie të borxhit dhe në shkretim, pasi qindra mijëra njerëz të rinj ose vegjetojnë me paga mjerane, ose kanë ndërmend të “arratisen” nga Greqia.

Në 7 pikat kryesore të programit politik që prezantoi Varufakis përfshihen:

Ristrukturimi i borxhit publik të Greqisë, reduktimi i guximshëm i koeficienteve tatimorë, krijimi një sistemi publik jobankar për pagesat dhe transformimi i fondit të privatizimeve në një bankë zhvillimi.

Profesori kontraversal i ekonomisë, iu referua edhe çështjeve të politikës së jashtme dhe gjegjësisht negociatave që Athina po zhvillon me Shkupin për zgjidhjen e çështjes së emrit.

Varoufakis u shpreh në favor të një emri të përbërë, duke theksuar se kjo i intereson Greqisë. Por ai shtoi se rreziku më i madh nga vendi fqinj nuk vjen prej demonstratave për Aleksandrin e Madh, por nga përçarja.

“Në Tetovë ndodhen shqiptarë të armatosur, të gatshëm që të shpërbëjnë ish-Republikën Jugosllave të Maqedonisë, në emër të Shqipërisë së Madhe”. Ky zhvillim “do të jetë një kërcënim për interesat tona kombëtare”, tha Varoufakis.

/Ora News