Vitamina D3 mund të përgjysmojë rrezikun për një atak të dytë në zemër

Një studim tregon se vitamina D3 mund të ulë me 50% mundësinë që një person që ka kaluar një atak në zemër të ketë edhe një tjetër.

Në studim morën pjesë mbi 600 persona që kishin pasur së fundmi një atak në zemër. Një pjesë morën trajtimin e zakonshëm, ndërsa të tjerët morën vitaminë D3 për të rritur nivelin e saj në gjak mbi 40 ng/mL.

Trupi prodhon vitaminë D nga drita e diellit, por rreth 13% e njerëzve në Evropë kanë mungesë të madhe të saj.

Pjesëmarrësit që morën vitaminë D3 kishin nevojë për një dozë më të lartë (rreth 5,000 IU në ditë) për të arritur nivelin e duhur. Studiuesit kontrollonin çdo vit për t’u siguruar që nivelet mbeteshin të larta.

Rezultatet treguan se rreziku për një atak të dytë në zemër u përgjysmua tek ata që morën vitaminë D3, pa efekte anësore negative.

Megjithatë, ekspertët paralajmërojnë të mos merret më shumë se 4,000 IU në ditë, pasi dozat e larta mund të dëmtojnë veshkat ose të rrisin kalciumin në gjak.

Studiuesit theksojnë se nevojiten kërkime të tjera për të konfirmuar këto gjetje.