Arbana Osmani ndez rrjetin për rikthimin e saj në televizion

Moderatorja shumë e dashur nga publiku, Arbana Osmani ka qenë nën një presion të vazhdueshëm publik për rikthimin në ekran. Ajo vendosi që rikthimin ta realizonte vitin e kaluar jo në formën klasike televizive, por përmes një projekti në YouTube me titullin “Mirëmbrëma yje”. Në një intervistë të fundit, moderatorja konfirmoi se sezoni i dytë i këtij formati është në përgatitje, ndërsa paralajmëroi edhe një projekt tjetër, sërish për YouTube.

Vëmendja ndaj saj u shtua ndjeshëm pas paraqitjes si mysafire speciale në X Factor, një moment që u interpretua si një kalim i mundshëm drejt ekranit të TV Klan. Spekulimet nuk u shuan, përkundrazi morën hov të ri kur Arbana publikoi dje një fotografi me regjisoren e njohur të këtij televizioni, Vera Grabocka.

Ky postim ndezi rrjetin dhe la të hapura pyetje mbi planet e saj profesionale. Mbetet të shihet nëse bëhet fjalë për një takim miqësor mes dy emrave të njohur të medias, apo në prapaskenë po përgatitet një spektakël i madh që do ta rikthente Osmanin në televizion në një format të ri.