Bes Kallaku: Kam një javë që shikoj surratin tim në facebook

Një ceremoni si e Hirushes. Padyshim që kjo ishte ideja dhe dëshira e Xhensilës dhe Besit, kur menduan për dasmën e tyre dhe duket se e realizuan. Dyshja simpatike ka celebruar mbrëmjen e së premtes dashurinë e tyre 7-vjeçare. Me 380 të ftuar dhe me detaje të përsosura, çifti iu betua njëri-tjetrit për dashuri të përjetshme. Ditën e diel dyshja e ekranit patën edhe ceremoninë tjetër.

Një darkë më të thjeshtë, me rrethin e ngushtë familjar, për ta mbyllur kështu historinë e martesës. Tashmë jeta për çiftin e të sapomartuarve ka nisur krejt normalisht, duke shijuar edhe ditët e para me statusin e ri. “Summer Pages” i “Gazeta Shqiptare” ka mundur t’i shkëpusë një prononcim lidhur me ditët e para me statusin si burrë i martuar.

Por, duke njohur sensin e humorit të Besit, natyrisht që përgjigja do të ishte plot satirë brenda. “A thua se unë kam 50 vjet beqar dhe tani më ka ndryshuar jeta me martesën. Në kohën e sotme jeta më ndryshon kur të vijë fëmija. Kam 7 vjet me Xhensilën dhe s’ka asnjë ndryshim”, ka thënë aktori i “Portokallisë”.

Politikanët e ftuar, shpenzimet, fustanet e nuses, mbrëmje e beqarisë, këngët e dashurisë, betimet romantike kanë qenë në fokus të medias përgjatë ditëve të fundit.

Duket se Besi dhe Xhensila kanë përfshirë të gjithë publikun me dasmën madhështore që bënë. E nëse publiku është i etur për të mësuar detaje të reja, Besi ka deklaruar për “GSH” se është lodhur duke parë një javë rresht fytyrën e tij në rrjetet sociale. “Po mërzitem vetë, jo më të tjerët. Kam 1 javë që sa hap ‘Facebook’-un, më del veç surrati im. Mos prapë!”, ka thënë me shaka aktori.