“BET Awards” nderon artistët më të dalluar me ngjyrë

Ylli i hip-hopit, Kendrick Lamar, këngëtar i muzikës R&B Chris Brown dhe artistja e repit Nicki Minaj kryesuan shpërblimet e sivjetme në “BET” me fitimin e më së shumti shpërblimeve, ndërsa gjatë mbrëmjes, e cila nderon artistët më të talentuar me ngjyrë, u nderuan edhe veteranët e muzikës Smokey Robinson dhe Janet Jackson. Lamar u shpall “Artisti më i mirë i hip hop-it”, ndërsa Nicki Minaj fitoi të njëjtin shpërblim në kategorinë e femrave. Ndërsa gjatë mbrëmjes Chris Brown u nderua me çmimin “Artisti më i mirë i muzikës R&B dhe pop”. Por, disa prej personave më të duartrokitur dhe të nderuar të mbrëmjes ishin veteranët e skenës muzikore. Smokey Robinson u mirëprit me ovacione në skenë me të dalë për të marrë çmimin për arritje jetësore. Ndërsa Janet Jackson, e cila ka një kohë që është larguar nga qendra e vëmendjes së publikut, u rikthye me çmimin “Ikonë”. Ajo nuk hezitoi t’i falënderonte adhuruesit, bashkëshortin dhe familjen e saj për përkrahjen. Ceremonia e ndarjes së çmimeve BET u mbajt në Los Angeles dhe ka për qëllim të nderojë muzikantët, aktorët dhe atletët më të mirë me ngjyrë.