Çifti perfekt në publik, por me tradhëti dhe një dramë që tronditi Eni Çobanin

Juristja Eni Çobani ka rrëfyer në podkastin e Grida Dumës një nga rastet më të forta që ka ndërmjetësuar: një çift shumë i njohur dhe pjesë e një familjeje të pasur shqiptare, që në publik shfaqej si një familje perfekte. “Unë ata i kisha takuar herë pas here si ajo familja që vetëm putheshin dhe përqafoheshin”, tregoi Çobani.

Sipas saj, pas këtij imazhi fshihej një martesë e thyer, me tradhti nga të dyja palët, mungesë komunikimi dhe jetë të ndara. Situata u komplikua edhe më tej pas lindjes së një fëmije, për të cilin bashkëshorti refuzoi atësinë. “Ndërkohë ata kishin një dramë brenda familjes, ku sytë e tyre nuk e shprehnin jashtë, por ata vuanin.”

Çifti nuk u divorcua. Sot ata nuk jetojnë bashkë, ndërsa secili vazhdon jetën e vet, por martesa ligjërisht vazhdon. Sipas Çobanit, gruaja nuk ka pranuar divorcin edhe për shkak të pasurisë dhe kontributit të saj në biznes. “Ajo e quan jo vetëm tradhti morale, por edhe ndaj kontributit të saj. Ajo është ndjerë e fyer edhe intelektualisht.”

Në fund, ndërmjetësimi solli një zgjidhje, por jo rikthimin e çiftit si më parë. ”Situata u çlirua, janë të padivorcuar, vazhdojnë në dashuritë e tyre dhe sigurisht që nuk jetojnë fizikisht bashkë, por martesa vazhdon”. Rrëfimi i Çobanit rikthen në vëmendje një të vërtetë të thjeshtë: ajo që shohim nga jashtë nuk tregon gjithmonë realitetin e një marrëdhënieje.