Dasma më virale në rrjet/ Sam dhe Rinesa Muleci festojnë dashurinë mes traditës dhe surprizave

Showbiz E Shtunë, 15 Gusht 2026 14:12

Sezoni i dasmave është kthyer në një event të rëndësishëm në atë që e quajmë viralitet. Sam dhe Rinesa Muleci, janë kthyer në një nga çiftet më të komentuar të momentit në rrjetet sociale, pas dasmës së tyre madhështore që tërhoqi vëmendjen e publikut shqiptar. Edhe pse jetojnë në Austri, çifti me origjinë nga Kosova ka dëshmuar se largësia nuk i ka bërë të harrojnë traditat shqiptare, as Drenasin. Nga marrja e nuses dhe deri tek festa e madhe, çdo moment i ceremonive të tyre ka qenë i mbushur me emocione, elegancë dhe elemente të forta të traditës, duke e bërë dasmën një prej ngjarjeve më virale të ditëve të fundit.

Një vëmendje të veçantë morën edhe surprizat e përgatitura për çiftin. Një prej tyre ishte këngëtarja Lule Mustafa, e cila u bë pjesë e atmosferës festive dhe i dhuroi çiftit momente të paharrueshme. Dasmën çifti zgjodhi ta zhvillonte në qytetin e bukur të Prizrenit.

Pas gjithë emocioneve të dasmës, Sam dhe Rinesa duket se kanë nisur një tjetër kapitull të bukur së bashku. Përmes postimeve në rrjetet sociale, çifti ka ndarë me ndjekësit pamje nga pushimet e tyre në Shqipëri, ku kanë zgjedhur Sarandën për të shijuar ditët e para pas martesës.

Mes dasmës tradicionale, surprizave të veçanta dhe pushimeve në bregdetin shqiptar, Sam dhe Rinesa po vazhdojnë të rrëmbejnë vëmendjen e publikut, duke e bërë historinë e tyre një prej më të komentuarave në rrjetet sociale.