Ed Sheeran me film dokumentar

Ed Sheeran po bën një film me prapaskenat e koncertit. Këngëtari 24-vjeçar ka bërë të ditur lajmin se planifikon të ndjekë hapat e kolegëve të tij, Katy Perry, Justin Bieber dhe djelmoshat e grupit “One Direction”, duke krijuar një dokumentar, i cili bazohet në prapaskenat e koncerteve të tij në stadiumin “Wembley” të Londrës, të cilët do të mbahen në muajin korrik. Krijuesi i hitit “Thinking Out Loud” do të pushtohet nga kamerat prapa skenës, para se të dalë për të performuar para 90.000 adhuruesve të tij. Por, pavarësisht se Ed ka pranuar që ekipi i kameramanëve ta ndjekë atë në çdo hap gjatë koncerteve të muajit korrik, këngëtari gjithnjë e thekson faktin se nuk i pëlqen të jetë në qendër të vëmendjes së paparacëve dhe kameramanëve. Gjatë një interviste për të përditshmen “The Sun”, kantautori ka thënë: “Nëse do të kisha fëmijë dhe dikush më thotë, ja ku i ke këto para dhe bëhu pjesë e një shou real, nuk mendoj se do ta pranoja këtë gjë. Të paktën jo në këtë kohë, më vonë, nuk i dihet”. Ed Sheran para një muaji publikoi këngën e tij të re me titull “Photograph”, së cilës i ka bashkëngjitur edhe një videoklip mjaft interesant. Përmes disa videove familjare, këngëtari sjell momente të ndryshme nga fëmijëria e tij. Aty ai shihet kur është ende foshnje, pastaj duke mësuar t’u bjerë instrumenteve, si dhe përfshihen disa sekuenca nga performancat e tij me kitarë në rrugë, para se të bëhej i famshëm.