Spekulimet kanë nisur dhe rrjeti po zien: “Big Brother VIP Albania 5” pritet të rikthehet fuqishëm në ekran, dhe si gjithmonë, emrat që përfliten për hyrje janë më “të nxehtë” se kurrë.
Edhe pse nuk ka ende një listë zyrtare, disa figura publike janë bërë pjesë e thashethemeve të para. Salsano Rrapi, aktor dhe moderator shumë i dashur për publikun, ka pranuar në një intervistë televizive se ka marrë një ftesë nga produksioni. “As po, as jo” ishte përgjigjja e tij, duke shtuar kuriozitetin dhe dyshimet.
Por nuk mbaron me kaq. Dy emra të tjerë që po qarkullojnë me shpejtësi në rrjet janë këngëtarja Argjentina Ramosaj dhe modeli e njëkohësisht trajner fitnesi, Mateo Borri, të cilët fansat i kanë përmendur si hyrje të mundshme që mund të ndezin atmosferën.
Po ashtu, në listë janë përmendur edhe Evi Reçi, Donald Veshaj dhe Einxhel Shkira, ndonëse në këtë fazë çdo emër është spekulim.
Pas suksesit të “BB VIP 2”, i cili mbetet edicioni më i komentuar dhe më kaotik deri më sot, pritshmëritë janë të larta. Me premtime për një kast “bombë”, dinamika të reja dhe surpriza të mëdha, mbetet për t’u parë nëse ky sezon do të jetë i denjë për hype-in që po krijohet.
