FOTO/ Fenomeni në Eurovision quhet Alis, ”Nân” është videoja më e ndjekur në Instagram

Shqipëria ka ndezur skenën e Eurovisionit në Vjenë me një nga performancat më emocionuese të këtij edicioni. Kënga ”Nân” e interpretuar nga Alis Kallaçi ka shpërthyer në rrjetet sociale, duke thyer rekorde shikueshmërie në faqen zyrtare të Eurovision-it në Instagram, me mbi 4 milionë klikime pa kaluar 24 orë dhe duke u renditur në vendin e parë si performaca më e ndjekur, komentuar. ”Nân” kryeson bindshëm për nga klikueshmëria dhe reagimet e publikut, duke lënë pas shumë prej këngëve favorite të këtij viti. Në vendin e dytë renditet “Eclipse” e Australisë, ndërsa performanca shqiptare po konsiderohet si një nga momentet më të forta artistike të festivalit.

Me një interpretim vokal të fuqishëm, emocional dhe autentik, Alis elektrizoi arenën Wiener Stadthalle gjatë natës së dytë gjysmëfinale, duke siguruar me meritë kualifikimin e Shqipërisë për finalen e madhe të së shtunës. ”Nân” nuk ishte thjesht një këngë, është një rrëfim i dhimbshëm dhe krenar për plagën e emigrimit, për nënat shqiptare që presin rikthimin e fëmijëve të tyre. Performanca ndërthurte traditën shqiptare me një estetikë moderne dhe të errët skenike, duke krijuar një atmosferë që mbërtheu publikun europian.

Një nga momentet më prekëse të performancës ishte shfaqja në skenë e aktores së njohur Rajmonda Bulku, e cila me interpretimin e saj drithërues i dha performancës dimension teatror dhe emocional. Skena u hap me simbolikën e një piste avioni, metaforë e largimit të shqiptarëve drejt botës, por edhe e shpresës për kthim. Në ekranin gjigant u shfaqën nëna nga krahina të ndryshme shqiptare, ndërsa kostumet tradicionale të kombinuara me elemente moderne, si shqiponja e zezë në veshjen e Alisit, krijuan një identitet të fortë kombëtar në skenën europiane.

Edhe mediat ndërkombëtare kanë reaguar me superlativa për performancën shqiptare. BBC e cilësoi interpretimin e Alisit si “emocional dhe të paharrueshëm”, duke vlerësuar jo vetëm vokalin, por edhe mesazhin e thellë që kënga përcjell. Duartrokitjet e gjata, brohoritjet e publikut dhe reagimet entuziaste në prova gjenerale konfirmuan se Shqipëria këtë vit nuk është thjesht pjesëmarrëse, por një nga pretendentet më serioze për të lënë gjurmë në Eurovision. Të shtunën, më 16 maj, Alis do të rikthehet në skenën e Eurovisionit për finalen e madhe, ku “Nân” pritet të jetë një nga performancat më të komentuara të natës.