Harry flet për herë të parë për takimin me mbretin Charles

Princi Harry ka thyer heshtjen. Ai u takua me babain e tij, mbretin Charles III i cili vuan nga kanceri. Në një intervistë për “Good Morning America”, princi tha se e do familjen e tij dhe mendon se rastet e sëmundjeve i bashkojnë familjet.

“Dëgjo, e dua familjen time”, tha duka i Sussex përballë moderatorit Will Reeve. “Fakti që pata mundësinë të hipja në atë avion dhe të shkoja ta shihja e të kaloja kohë me të, më bën të ndihem shumë mirënjohës”. Reeve pyeti princin nëse diagnostikimi i Charles me kancer mund të jetë një shtysë që të sjellë pajtimin e familjes mbretërore dhe Harry u përgjigj: “Sigurisht! Po, jam i bindur. Mendoj se çdo sëmundje i bashkon familjet”.

Më 5 shkurt, pallati Buckingham njoftoi se mbreti Charles III vuan nga kanceri, duke mos treguar llojin, por siguroi publikun dhe mediat që nuk kishte të bënte me kancer në prostatë.