Edhe pse po jetojnë në normalitetin e Covid-19, festa e Halloween duket ndryshe këtë vit në gjithë botën, por ajo që mban fronin për shndërrimet më fantastike, po gjen ende mënyra për të festuar. Ditën e sotme, 31 tetor, Heidi Klum publikoi një film të shkurtër horror në Instagram-in e saj, në të cilin aktorë janë ajo, bashkëshorti i saj, Tom Kaulitz dhe katër fëmijët që modelja ka nga martesa me ish-bashkëshortin, Seal.
“Me bllokime në gjithë botën këtë vit, unë doja të bëja një projekt argëtues në shtëpi me familjen time, kështu që më erdhi ideja e xhirimit të një filmi të shkurtër horror, ku të gjithë mund të jemi aktorët. Ishte një mënyrë kaq argëtuese, që përfshinte gjithë familjen dhe fëmijët e mi e shijuan vërtet këtë proces”,-tha ajo.
Në filmin e shkurtër, Klum dhe familja e saj po shijojnë një Halloween, duke ruajtur distancën sociale, derisa bie një rrufe, që i shndërron fëmijët e supermodeles në mumie zombi, të cilët fillojnë ta ndjekin atë nëpër shtëpi.
