Humbi djalin e vetëm, këngëtarja rigjen motivin tek vajza e birësuar (FOTO)

Showbiz E Shtunë, 22 Maj 2021 09:33

Kanë kaluar katër vite nga vdekja tragjike e djalit të këngëtares folklorike shqiptare, Vera Laçi, e përjeton si të ketë ndodhur sot ajo ngjarje. E ftuar në studion e emisionit të pasdites me Rudina Magjistarin, këngëtarja rrëfeu tragjedinë e saj dhe rigjetjen e motivit të jetës tek Dea.

Denis Duka ndërroi jetë në një aksident rrugor në moshën 22-vjeçare, duke lënë pas një dhimbje të pamatë tek dy prindërit e tij.

Mes lotëve që i kishin pushtuar zërin, Vera tregoi se: “Prej nga ai moment, gjithҫka në familjen tonë ndryshoi totalisht, është një dhimbje që nuk ka ngushëllim. Është e tmerrshme si për nënën, ashtu edhe për babin, edhe pse thonë se baballlarët e përjetojnë dhimbjen ndryshe… Nga ajo ditë jeta ka ndryshuar, dhimbja është gjithmonë aty dhe e tmerrshme, kalojnë ditët, por dhimbja është e njëjtë”.

Ditëve, javëve, muajve dhe viteve që kalonin me pikëllim, të demotivuar për të vazhduar jetën, një vit e gjysmë më vonë ata vendosën të birësonin një vajzë.

E vogla e famijes, Dea u birësua kur ajo ishte vetëm 8 muajshe dhe Vera tregon se procedurat nuk kanë qenë të lehta. E pyetur nëse një ditë do t’ia tregojë Deas të vërtetën, Vera pohon se vogëlushja 3-vjeçare bën që tani pyetje shumë të zgjuara dhe do ishte e pamundur t’ia fshihte diçka të tillë.

“Unë flas me Dean dhe gradualisht do t’ia them të gjitha, por ajo është vajza ime. Kam një dashuri shumë të madhe për të”,-u shpreh këngëtarja, duke pranuar se më në fund ka gjetur motivin që e shtyn të ecë përpara.