Me konfliktin në Lindjen e Mesme që është ende larg përfundimit, dyshimet mbi prezencën e Iranit në Botërorin “FIFA2026” janë ende të mëdha.
Për t’i dhënë fund këtij diskutimi, të paktën për momentin, ka menduar presidenti i FIFA-s, Gianni Infantino, i cili në mënyrë befasuese u shfaq në pushimin e ndeshjes miqësore ndërmjet Iranit dhe Costa Rica, një miqësore që u zhvillua në Antalya të Turqisë.
“Irani do të jetë në Botëror, kjo është arsyeja pse ndodhem këtu. Madje ju siguroj se do të luajë në SHBA”, u shpreh Infantino.
Kjo deklaratë e bosit të FIFA-s vjen menjëherë pasi Federata e Iranin ia kaloi topin FIFA-s duke kërkuar nga Infantoni garanci për sigurinë dhe prezencën e tyre në Botëror. Pavarësisht kësaj deklarate të Infantinos, mbetet ende për të kuptuar se cili do të jetë reagimi i Iranin.