Koncerti i Kanye West në Tiranë, ja ku do të ngrihet stadiumi për 60 mijë persona

Në afërsi të autostradës Tiranë-Durrës shumë shpejt pritet të nisë puna për montimin e stadiumit më të ri të përkohshëm Eagle Stadium apo Stadiumi Shqiponja, ku në 11 korrik do të mbajë koncertin e tij këngëtar i njohur Kanye West. Zona e zgjedhur ka një sipërfaqe prej disa dhjetra mijë metra katrorë, dhe është në hyrje të Tiranës, buzë rrugës dytësore, vetëm 2 kilometra nga qendra e kryeqytetit.

“Në qendër të stadiumit pritet të ngrihet një glob i madh gjigant që përkon me simbolikën që këngëtari i njohur përdor në turet e tij botërore. Ndërkohë që stadiumi pritet të akomodojë 60.000 spektatorë, ndërsa tani janë shitur rreth 20.000 bileta”. Çmimet e biletave fillojnë nga 120 euro, ndërkohë për vendet VIP ato arrijnë deri në 339 euro.

Siç mësohet, për lëvizjet e mjeteve që do të bëjnë transportin e spektatorëve, do të lihen korsi të dedikuara. Stadiumi do të qëndrojë për disa javë dhe do të shihet mundësia për të organizuar edhe aktivitete të tjera. Koncerti i Kanye West në Tiranë është pjesë e turit botëror të artistit për vitin 2026, që nis në SHBA dhe më pas vijon në Azi dhe Europë.