Dy mjekët e akuzuar lidhur me vdekjen e këngëtarit të njohur grek, Giorgos Mazonakis, pritet të dalin të hënën para gjykatës. Hetimet janë përqendruar te ngjarjet e ndodhura në një klinikë private në zonën e Kolonakit, në Athinë, ku këngëtari ndodhej pak para se të humbte jetën. Mjekët të cilët drejtojnë klinikën, akuzohen për vepër penale që lidhet me rrezikimin e jetës, pasojat e së cilës kanë sjellë vdekjen e pacientit.
Sipas mediave greke, që u referohen të dhënave të dosjes hetimore, njëri prej mjekëve telefonoi shërbimet e urgjencës rreth orës 16:21, duke njoftuar se një 55-vjeçar mund të ishte pa shenja jete dhe se po i kryente reanimim kardiopulmonar. Ekipet e urgjencës mbërritën pak minuta më vonë dhe e gjetën mjekun duke vijuar përpjekjet për reanimimin e pacientit. Në fokus të hetimit janë edhe të dhënat dixhitale të gjetura në telefonat dhe sistemet elektronike të klinikës. Hetuesit kanë rikuperuar një fotografi të fshirë nga telefoni i mjekes, e cila paraqet Mazonakisin të lidhur me një aparat plazmafereze.
Autoritetet po shqyrtojnë të dhëna të fshira nga kalendari elektronik i klinikës, në përpjekje për të përcaktuar me saktësi se kur ka mbërritur këngëtari dhe çfarë trajtimi ka marrë. Një tjetër element që ka tërhequr vëmendjen e hetuesve është një kërkimi në ChatGPT për mënyrën e rikthimit në jetë të një pacienti, ndërsa Mazonakis ndodhej ende në klinikë. Ky detaj po shqyrtohet në kuadër të rindërtimit të plotë të kronologjisë së ngjarjeve.
Edhe koha e mbërritjes së këngëtarit në klinikë mbetet objekt hetimi. Një shofer taksie ka deklaruar se e kishte lënë Mazonakisin pranë klinikës rreth orës 13:55, ndërsa pamjet filmike dyshohet se tregojnë se ai kishte hyrë në ambientet e klinikës rreth orës 13:00. Në deklarimet fillestare, njëri prej mjekëve kishte thënë se këngëtari kishte mbërritur rreth orës 16:00. Për të përcaktuar shkakun e saktë të vdekjes priten ende rezultatet e analizave toksikologjike dhe histologjike. Familja e Giorgos Mazonakis ka deklaruar ndërkohë se mund të kërkojë rëndimin e akuzave ndaj mjekëve, duke kërkuar që ato të shqyrtohen edhe në kuadër të një akuze për vrasje.