Modelja dhe këngëtarja Oriola Marashi bëri një deklaratë publike, duke kërkuar ndjesë lidhur me një togfjalësh të cilin e kishte përdorur në një video (tanimë të fshirë), ku thoshte “te gabi në Laprakë”. Oriola, ndoshta si shumë prej nesh, nuk ishte në dijeni që fjala “gabi” ka konotacion ofendues për komunitetin rom në vend dhe pikërisht, e theksoi në reagimin e saj.
“Në një video që kam postuar më herët, përdora pa dashje një fjalë që nuk e dija se ishte ofenduese për komunitetin rom. E kam hequr videon dhe dua të kërkoj ndjesë nëse dikush është ndjerë i lënduar. Kam respekt të madh për çdo kulturë dhe komunitet në vendin tim”.
Në videon e fshirë, njerëzit komentuan shumë shprehinë e modeles, duke i thënë të jetë më e kujdesshme, pasi fjalët e saj mund të jenë ofenduese dhe raciste. Një prej komenteve që bëri xhiron e rrjetit ishte edhe ai i Dr. Kaim Hadroj, pedagog në universitetin “Bielefeld”, i cili e sqaroi se videoja e saj mund të cilësohej si një promovim i diskriminimit.
