Presidenti Nishani feston 50 -vjetorin, ja dhurata e veçantë nga shqiptarët e Çikagos

Presidenti i Shqipërisë, Bujar Nishani kremtoi dje 50 vjetorin e lindjes. Por ditëlindja e tij ka përkuar me një vizitë në shtetin e Illinoisit të SHBA-ve. I shoqëruar nga Zonja e Parë, Odeta Nishani dhe delegacioni zyrtar, Presidenti, siç duket edhe nga foto u mirëprit me shumë ngrohtësi nga bashkatdhetarët shqiptaro-amerikanë të Çikagos në shtetin e Illinoisit. Ata i dhuruan Presidentit këtë fanellë me ngjyrat kuqezi, ku është shkruar mbiemri i tij dhe numri 50, në shenjë simbolike për ditëlindjen e 50-të tij.

Fillimisht Presidenti dhe Zonja e Parë takuan një nga një drejtuesit dhe anëtarët e rreth 20 shoqatave atdhetare, kulturore dhe shoqërore të shqiptarëve në mbarë shtetin e Ilinoisit, drejtuesit e komuniteteve fetare, të cilët i mikpritës duke u shprehur nevojën që edhe në Çikago të hapet një konsullatë e Republikës së Shqipërisë.

Duke iu drejtuar të pranishmëve dhe përmes tyre mbarë komunitetit shqiptaro-amerikan të Ilinoisit, Presidenti Nishani theksoi se: “Qëllimi kryesor i vizitës në Çikago ishte pikërisht ky takim me ta, për të parë, ndjerë dhe prekur nga afër një komunitet kaq të mrekullueshëm”.