Selvije Jao publikon këngën e fundit të Shpat Kasapit: E mbajta të fshehtë për muaj të tërë

Gati një vit pas ndarjes nga jeta të këngëtarit Shpat Kasapi, është publikuar kënga e tij “A je rahat pa mu”, një projekt që artisti kishte menduar ta lançonte gjatë pjesëmarrjes së tij në “Big Brother VIP Albania 5”.

Lajmin e ka bërë të ditur bashkëshortja e tij, Selvije Jao, e cila ka ndarë në Instagram historinë e veçantë që lidhet me këtë këngë dhe arsyet pse publikimi i saj ka një domethënie të madhe për të.

Selvija ka treguar se, përpara se Shpati të hynte në reality show, ai i kishte dërguar katër versione demo dhe i kishte kërkuar të zgjidhte atë që i pëlqente më shumë. Ajo kishte përzgjedhur pikërisht këngën “A je rahat pa mu”, të cilën çifti kishte planifikuar ta publikonte ndërsa këngëtari do të ishte brenda shtëpisë së Big Brother-it.

Megjithatë, planet ndryshuan pas ndarjes së tij nga jeta. Sipas Selvijes, disa muaj më vonë, producenti i Shpatit i dorëzoi këngën të përfunduar, në një moment kur ajo ende nuk ndihej gati për ta ndarë me publikun.

Bashkëshortja e këngëtarit ka falënderuar producentin Artirec për kontributin dhe mbështetjen e treguar ndaj Shpatit, si dhe Imperialb_sadiku për punën dhe përkushtimin në realizimin e projektit.

Ajo ka rrëfyer se e mbajti këngën për vete për muaj të tërë, pasi i duhej kohë për të përballuar emocionet që lidhen me të. Tashmë, vendosi ta publikojë si një amanet të bashkëshortit të ndjerë, me dëshirën që zëri dhe kujtimi i tij të vazhdojnë të jetojnë përmes muzikës.

Për Selvijen, titulli “A je rahat pa mu” merr sot një kuptim edhe më të dhimbshëm, duke e kthyer këngën në një kujtim të veçantë që do të mbetet i gjallë përmes artit të Shpat Kasapit.