Stresi: Më dhimbsen policët që u dënuan prej meje

Arkimed Lushaj, i njohur me emrin e artit si Stresi, ka thënë për gazetën "Panorama" se është diku jashtë Shqipërisë dhe se është mirë. Ai ka thënë se i vjen shumë keq për policët e arrestuar dhe të pezulluar pas arratisjes së tij, teksa beson se drejtësia do të japë drejtësi për ta.

Nga arratia, Stresi komenton mënyrën sesi ishte arrestuar nga patrulla e Komisariatit Nr 3., me akuzën e "shkeljes së rregullave të qarkullimit rrugor". Policia fillimisht njoftoi se Stresi ishte kapur duke drejtuar makinën nën efektin e alkoolit, por burime zyrtare të policisë thanë më vonë se ndalimi i këngëtarit është bërë për një arsye tjetër, që lidhet edhe me patentën.

Gjatë intervistës, Stresi pranon se patentën nuk e ka pasur me vete në momentin e arrestimit nga policia. Dje, këngëtari kishte lënë të hapur një numër telefoni zviceran, për të mos humbur kontaktet me të afërmit e tij. Në rrëfimin e tij, Stresi ka nënvizuar se vendosi të arratisej, pasi kuptoi se do të mbahej pa të drejtë në burg për tre ditë.