U arrestua me kokainë dhe është në burg? Vjen reagimi i parë nga Shpat Kasapi

Menaxherja e këngëtarit Shpat Kasapi, për të cilin mediat maqedonase shkruanin se është vënë në pranga pasi ishte kapur me doza kokaine, Adelina Qollako, e ka mohuar këtë lajm dhe ka shtuar se e gjitha është propagandë për të prishur figurën e këngëtarit.

”Shpati s’është i arrestuar. Ai ka lëvizje të lirë dhe ndaj tij nuk ka asnjë bazë ligjore. Lajmi është propagandë, tentativë për njollosjen e reputacionit të tij”,-ka thënë Qollako. Nga ana tjetër, vetë këngëtari ka publikuar një video në Instastory ku shkruan se ndodhet në Tiranë, në një nga lokalet e kryeqytetit, ndërsa mediat e fusin në burg.

Lajmi për arrestimin e Kasapit u bë publik sot, ndërsa shkruhej se në fakt këngëtari ishte vënë në pranga para një muaji, pasi gjatë një kontrolli policia i kishte gjetur doza kokaine. Ai është lënë i lirë dhe po gjykohet në gjendje të lirë.