VIDEO/ Lumturi në familjen mbretërore, Princ Leka do të bëhet baba për herë të dytë

Princ Leka dhe partnerja e tij, Blerta Celibashi, po përjetojnë një nga momentet më të veçanta të jetës së tyre, pasi janë në pritje të fëmijës së parë së bashku.

Çifti është parë së fundmi në një aktivitet të organizuar nga Bashkia Mat me rastin e 104-vjetorit të shpalljes së Burrelit si qendër administrative. Në këtë event, vëmendjen e të gjithëve e tërhoqi Blerta, e cila u shfaq me shenja të dukshme të shtatzënisë, duke konfirmuar kështu pritjen e ëmbël.

Pak kohë më parë, ata kurorëzuan lidhjen e tyre në një ceremoni private, duke nisur një etapë të re në jetën personale të Princ Lekës. Lajmi i martesës u bë publik nga Oborri Mbretëror Shqiptar, së bashku me një fotografi zyrtare të çiftit të realizuar në Kështjellën Apponyi, një vend me simbolikë historike për familjen mbretërore.

Pas martesës, Blerta Celibashi është bërë pjesë e familjes mbretërore shqiptare, duke marrë mbiemrin Zogu dhe titullin “Princeshë e Shqiptarëve”. Princ Leka është gjithashtu baba i një vajze, Geraldinës, nga martesa e tij e mëparshme me Elia Zaharinë.