VIDEO/ Shpërthimi i tri*olit, Jozi reagon për herë të parë: Nuk jam unë në shënjestër

A ishte banesa e Joz Markut në shënjestër të një sulmi me tritol, por që shënjestra u ngatërrua? Këngëtari ka reaguar publikisht pas disa lajmeve të shpërndara në portale, sipas të cilave shpërthimi me lëndë plasëse në një banesë në Fushë Kuqe kishte si objektiv atë. Në një postim në Instastory, Jozi i ka quajtur lajmet e përhapura si hamendësime të portaleve, duke theksuar se nuk ka asgjë të vërtetë në to.

Ai ka sqaruar se organet shtetërore tashmë kanë dalë me një deklaratë zyrtare, duke përcaktuar qartë se kujt i është drejtuar sulmi. Në fund të reagimit të tij, këngëtari ka shprehur mirënjohjen për të gjithë ndjekësit dhe miqtë që i kanë shkruar dhe janë treguar të shqetësuar për gjendjen e tij. “Faleminderit të gjithëve për mesazhet dhe kujdesin. Jam mirë dhe ju vlerësoj pafund”,-ka shkruar Jozi.

Policia ka njoftuar se vijojnë hetimet për ngjarjen e ndodhur rreth orës 04:20 të mëngjesit në fshatin Gurëz. Sipas të dhënave zyrtare, një sasi e vogël lënde plasëse, e dyshuar artizanale, shpërtheu në portën e jashtme të murit rrethues të banesës së shtetases M.D, alias M.B.