Kryeministri Edi Rama, ka reguar pasi Shqipëria sot u zgjodh anëtare e përkohshme e Këshillit të Sigurimit në OKB.
Kreu i qeverisë, në një postim që ka bërë në rrjetet sociale e cilëson këtë si një lajm të bukur.
“LAJM I BUKUR
Me 175 vota nga 117 të nevojshme, Shqipëria sapo u zgjodh anëtare e Këshillit të Sigurimit të OKB për vitet 2022-2023.”
Pak më parë ka reaguar edhe Ambasadori Evropian në Tiranë Luigi Soreca, ku nëpërmjet një postimi në rrjetet sociale, tha se kjo është një ditë historike për Shqipërinë.
Shqipëria u zgjodh të premten, 11 qershor, anëtare jo e përhershme e Këshillit të Sigurimit të Kombeve të Bashkuara. Kjo shënon herën e parë të përzgjedhjes në këtë funksion, pas 65 vitesh nga anëtarësimi i saj në Organizatën e Kombeve të Bashkuara.
Këshilli i Sigurimit, një organ i OKB-së me kompetenca të fuqishme, përbëhet nga 15 anëtarë, 5 prej të cilëve të përhershëm, ShBA, Mbretëria e Bashkuar, Franca, Rusia dhe Kina që kanë të drejtë vetoje si dhe 10 anëtarë jo të përhershëm, me një mandat dy vjeçar.
Shqipëria, Brazili, Gaboni, Gana dhe Emiratet e Bashkuara Arabe ishin në garë, pa konkurentë nga rajonet përkatëse, për 5 vendet. Për t’u zgjedhur, secilës prej tyre i duhej të siguronte dy të tretat e votave të vendeve anëtare të OKB-së. Shqipëria mori 175 vota. Votimi ishte i fshehtë.
