14 ditë për të parë fytyrë e “plotë” të Tiranës së Egbo-s (VIDEO LAJM)

Tirana është skuadra e momentit në Superligë. Ekipi i drejtuar nga Emanuel Egbo po kalon një ecuri të jashtëzakonshme, me 7 fitore radhazi në kampionat.

Bardheblutë do të kenë tri prova forca ndaj Skënderbeut, Kukësit dhe Partizanit në javët e ardhshme në kampionat. Fillimisht do të presin korçarët një rival që e kanë mundur 3-1 në fazën e parë, por ndërkohë janë thyer 2-1 në fazën e dytë.

Egbo duhet t’i bëjë mirë llogarit pasi përballë do të jetë Ilir Daja, i cili ishte edhe trajneri që kishin përzgjedhur drejtuesit e Tiranës, një ide që do të dështonte nga forma e mirë e bardhebluve. Një arsye më shumë për strategun nigerian për të treguar se nuk është vetëm “Zoti” që e ndihmon për të fituar, por edhe aftësitë e tij menaxhuese.

Më pas do të jetë një tjetër provë shumë delikate ndaj Kukësit, që kryeson për momentin kampionatin. Shpëtim Duro është një strateg me shumë eksperiencë që di të marrë më të mirën në ndeshjet e mëdha, dhe ky do të jetë një test shumë i vështirë për Tiranën. Skuadra verilindore ka më shumë kualitet në fazën e avancuar dhe ka gjetur ekuilibrat në mbrojtje.

Në fund është derbi, ndeshja nga ku nisi edhe aventura fantastike e strategut nigerian dhe që po vijon me një ritëm të frikshëm. 14 ditë që do të jenë një provë force, ku do të zbulojmë dhe “fytyrën” e vërtetë të Tiranës së Egbo.