3 rekordet që mund të thyejë Liverpooli këtë sezon në Premier League

Ditën e djeshme, Liverpooli luajti ndeshjen e prapambetur ndaj West Ham, të cilin do ta fitonte duke vijuar serinë e rezultateve të frikshme në kampionat. Skuadra e Jurgen Klopp shijoi 3 pikët e radhës, falë golave të Salah dhe Oxlade-Chamberlain, duke krijuar një distancë prej 19 pikësh larg nga vendi i dytë që mbahet nga Manchester City.

Pas 24 ndeshjesh, “The Reds” kanë grumbulluar 70 pikë, falë 23 fitoreve dhe vetëm një barazimi, duke pasur një ecuri rekord në historinë e Premier League. Për ta ilustruar më saktë këtë ecuri të jashtëzakonshme, duhet ta dini që kampionët e Europës janë në garë për të thyer 3 rekorde në kampionatin anglez.

I pari ka të bëjë me fitoret radhazi, teksa ky rekord për momentin mbahet nga Manchester City, me 18 ndeshje radhazi, ndërkohë që deri më tani Liverpooli ka arritur 15.

Rekordi i dytë lidhet me Arsenalin e pathyeshëm, që në sezonin 2003-2004, arriti një seri prej 49 ndeshjesh pa humbje, deri më tani Liverpooli ka arritur në 41.

Në fund, është rekordi i pikëve në Premier League, që për momentin mbahet nga Manchester City i sezonit 2017-18 me 100 pikë. Liverpooli deri më tani ka grumbulluar 70 pikë, dhe kur kanë mbetur edhe 14 ndeshje, janë në lojë edhe 42 pikë. Sezoni i jashtëzakonshëm i Liverpoolit mund të bëhet historik. Ndoshta më i miri i të gjitha kohërave në Angli. /Rozalb Lika-Koha Jone/