Mbrëmja e çerekfinaleve të UEFA Champions League po dhuron emocione të forta dhe ritëm të jashtëzakonshëm.
Në Allianz Arena, përballja mes Bayern Munich dhe Real Madrid ka prodhuar një pjesë të parë spektakolare, e mbyllur me rezultatin 2-3 në favor të madrilenëve. Ndeshja nisi në mënyrë tronditëse për vendasit, pasi vetëm pas 40 sekondash lojë, një gabim i rëndë i portierit Manuel Neuer u shfrytëzua nga talenti turk Arda Güler, i cili realizoi nga distanca për avantazhin e hershëm të spanjollëve.
Reagimi i bavarezëve ishte i menjëhershëm. Në minutën e 6-të, pas një goditjeje këndi të ekzekutuar nga Joshua Kimmich, ishte Aleksandar Pavlović që me kokë barazoi rezultatin, duke kapur në befasi mbrojtjen dhe portierin Andriy Lunin.
Arda Güler u rikthye protagonist, duke realizuar një supergol nga goditja e dënimit për 1-2. Bavarezët nuk u dorëzuan dhe në minutën e 38-të barazuan sërish me Harry Kane, i cili finalizoi një aksion të ndërtuar nga Dayot Upamecano. Por pjesa e parë nuk ishte mbyllur ende. Në minutën e 42-të, një kundërsulm i shpejtë i Real Madrid u konkretizua me asistin e Vinícius Júnior dhe finalizimin e saktë të Kylian Mbappé, duke çuar shifrat në 2-3.
Ndërkohë, në Emirates Stadium, sfida mes Arsenal dhe Sporting CP ka qenë më e kujdesshme, me pjesën e parë që u mbyll pa gola, 0-0.