7 fitore në 7 ndeshje, Arsenali shkruan historinë në Champions League

Arsenali ka hyrë në historinë e Champions League pas fitores së madhe 3-1 ndaj Interit në “San Siro”. Skuadra e Mikel Artetës vijon ecurinë perfekte në Europë, duke regjistruar fitoren e shtatë radhazi në po aq ndeshje në këtë edicion të kompeticionit më të rëndësishëm për klube.

“Topçinjtë” e nisën ndeshjen në mënyrën më të mirë të mundshme, me Gabriel Jesus që zhbllokoi rezultatin që në minutën e 10-të, duke përfituar nga një top brenda zonës. Interi reagoi dhe barazoi me Petar Suçiç, i cili realizoi me një goditje të fuqishme nga jashtë zone.

Megjithatë, Arsenali rifitoi avantazhin në minutën e 31-të. Pas një goditjeje standarde, Leandro Trossard devijoi topin për Gabriel Jesus, i cili me kokë nga afërsia shënoi golin e dytë personal dhe të dytin për skuadrën e tij. Gjashtë minuta nga fundi i takimit, Viktor Gyökeres vulosi fitoren me një realizim spektakolar, duke shënuar golin e tij të tretë këtë sezon në Champions League.

Kjo fitore ndaj Interit ka një peshë të veçantë historike për klubin londinez. Për herë të parë në historinë e tij, Arsenali ka arritur të fitojë shtatë ndeshje radhazi në një kompeticion të UEFA-s.

Në këtë sezon europian, Arsenali ka mposhtur Athletic Bilbao-n, Olympiacos-in, Atletico Madrid-in, Slavia Praga-n, Bayern Munich-un, Club Brugge-n dhe Interin, duke realizuar 20 gola dhe duke pësuar vetëm dy.

Me 21 pikë të plota, Arsenali kryeson renditjen e Champions League dhe do të luajë ndeshjen e fundit të fazës së ligës javën e ardhshme ndaj Kairat-it nga Kazakistani. Duke parë formën e shkëlqyer në Europë, skuadra londineze, edhe pse nuk e ka fituar kurrë Champions League, tashmë konsiderohet seriozisht si një nga favoritët për të shkuar deri në fund të turneut.