Adidas ka prezantuar topat zyrtarë të ndeshjeve për fazën e ligës së UEFA Champions League dhe UEFA Women’s Champions League për sezonin 2026/27. Dy modelet kanë dizajne të ndryshme, të frymëzuara nga përkushtimi, ambicia dhe puna në grup.
Topi i Champions League fokusohet te puna e padukshme që bëjnë futbollistët përpara se të ngjiten në skenën më të madhe të futbollit europian. Dizajni është frymëzuar nga stërvitjet në mëngjeset e ftohta, me mjegullën e fushës të shndërruar në një element vizual që simbolizon sakrificën dhe përgatitjen.
Topi ka një bazë të bardhë me përfundim metalik, ndërsa mjegulla kalon përmes yjeve ikonike të Champions League, duke krijuar shpërthime ngjyrash. Logoja e Adidas dhe ajo e kompeticionit janë në ngjyrë rozë të ndezur.
Për Champions League të femrave, Adidas ka zgjedhur konceptin “Ring of Light”, i ndërtuar rreth unazës me 11 yje, një për secilën lojtare në fushë. Dizajni simbolizon unitetin, punën në grup dhe ambicien.
Ky model kombinon ngjyrat vjollcë, të artë dhe portokalli mbi një bazë të bardhë, ndërsa detajet metalike në argjend i japin më shumë thellësi.
Të dy topat përdorin strukturën termosalduar pa qepje të Adidas, e projektuar për precizion, kontroll dhe qëndrueshmëri maksimale në nivelet më të larta të futbollit europian.
